Jacques Rutten; Nr 37. 27-08-1663 (RAL, Schepenbank Helden, inv nr 26, folio 7)
tekst in blauw geeft links aan naar onderliggende bladzijden
Testament Goerys Pigghen en Merry Gommans.In name Goedes ende der heliger dryvoldicheytt Amen. Kundt unde kennelyck sye een jeder openbaer wie dytt tegenwordighe testament syen hoeren lesen oder voorcomen weert dat op huydtt dato inden jaere uns heeren Jhesu Christy, unsers erloesers unde salichmaeckers een duisentt seeshondert ende dryeensestych den 27 augustus, Lennart Smollers Wyelm Jaecken schepen des gherychs Kessell ende Helden duen te weten, op het aenbringhen by uns gedaen van den erwerdyghen heer Jan Bysschoeps vycarius ende cappelaen in Helden ende doer twee naebeur Gaertten van Oyeen ende Jan Seelen, op het erstelyck veersueck van Goerys Pygghen ende Merry Gommans eheluiden uns aldaer vervuecht tot syne woenstede, allwaer wy desee VS Gorys ende Merry eheluiden kranck van lichaem befunden, edoch heurens verstaents soo vaell wy hebben kunnen vernhimen durch vuyt machtych befunden. Soo heeft hy Goerys ende Merry VS, overdinckende die swaricheyt des menschelycke geslaechs ende nae die seckerheyt des doets ende die unseckerheyt die uhre des selfs, daer met nae synen aeffsterven gheen gheschyell ofte dispeutz koemen meucht van iemanden van desen volghende der wyse der weeghe van testament, codicylle, ofte andere vuytterste wille op d'alder bestendichster formen ende mannyren rechtens gedispponyrtt ende gheordynirt als voelght. Inden ersten soo bevueltt hy testatuers haer seele Godt almachtych, synder gebenedyter moeder ende alle lyeve Goets helighen, ende haeer lychaem der ghewider erden. Ghevende legatirt ordinyrt, gheven ende maecken hy met ende in kraeft deses testament. Soo is Goerys ende Merry hebbende under heun beyden een doechter gheheyten Tisken. Soo is versproecken dat die doechter Tisken sall feur wtt hebben te weten hondert ende vyefftych gulden lopens ende een kuy ende een bedde met een kyest ende enen kast. Ten tweden is Vsproecken soo veer dese voorss dochter syech comt te bestaden sall sy met kryghen dese VS meubelen te weten dese VS kuy, een bedde, een kyst ende kaest. Ende dese VS hondert daller sullen bliven staen nae doett van dese VS testaturs. Noch is Goerrys hebbende een veurdoechter, verworven hebbende in synen ersten ehestandt, te weten met Mercken Nyssen, gheheyten Mercken. Soo is versprocken dat dese twe halffgeseusteren voorss sullen gelycke kinderen syn soo well in die eerffguederen als ock in die ghereyde guederen. Soo is Mercken Goryssen voorss vueer doechter hebbende vyeff veerdell gulden die welcke Goerys haeren vaeder heeft aen ghevanghen. Dye VS vyeff veerdell gulden sullen met desee VS maeckinghe gedoetsyert syn ende des sullen dese voorss geseusteren schoelt ende widerschoelt gelick draeghen. Het weelck aldus ghepassyert sall syen ende bliven nae aeff sterven dese VS eheluiden, waer aeff dese voorss testateurs veermuegh der Gheldersche Reformatioen te testyren te disponiren mechttych is dyt allsoo gepassyrt. In der forma gestaelt syende verclaert de voorss testateurs dyt haeren lesten will ende testament te syn dwelck hy off sy eheluiden voorss nae haeren doett beghert gheobbservyrt te hebben. Noch is versproecken soo Mercken, Gorryssen vueer dochter, met haeren eheman kaen ennyghe scheultt betalen ofte aeffleggen sall die halff suster Tysken Mercken ende Jannen, Merckens voorss maen, ghueettz duen te weten die helft. In orkundt der waerheytt soo heeft den erwydighen heer Jan Bysschops ende schepen voorss ende Gerytt Pygghen wesende den gherechten oem van Goeryssen ende dese VS naebuer met eyghenner handt ende handt merck onderteyckent, datum als boeven.
| ||